"ბათუმელების“ არქივიდან

(პოლიტ)პატიმრების ახლობლებმა ქუჩა გადაკეტეს

28.01.2004 • 2064
(პოლიტ)პატიმრების ახლობლებმა ქუჩა გადაკეტეს

ორშაბათს, ბათუმის სასამართლოს წინ, დაკავებული „ნაციონალების“, ნური ანანიძისა და ვაჟა კახიძის  ახლობლებმა ქუჩა გადაკეტეს.

დაკავებულთა ადვოკატები ირაკლი ფხალაძე და ზურაბ გვარჯალაძე  აცხადებენ, რომ დაპატიმრება უკანონოდ მოხდა და მას მოტივად პოლიტიკური სარჩული უდევს.

ზურაბ გვარჯალაძე: „ბრალდებები ვაჟა კახიძის მიმართ (იარაღის, საბრძოლო მასალისა და ნარკოტიკების უკანონო შეძენა-შენახვა) არის აშკარად შეთითხნილი, ჩხრეკა ჩატარდა უკანონოდ“. იგივეს აცხადებს ნური ანანიძის (თუმცა მის საქმეში ნარკოტიკი არ ფიგურირებს) ადვოკატიც, ირაკლი ფხალაძეც.

აქცია 1

გზის გადაკეტვის მიზეზი გახდა ის, რომ აჭარის უმაღლესმა სასამართლომ არ დააკმაყოფილა ადვოკატთა შუამდგომლობა საქალაქო სასამართლოს მიერ გამოტანილი აღმკვეთი ღონისძიების (წინასწარი პატიმრობა) გაუქმებისა და დაკავებულთა დაუყოვნებლივი გათავისუფლების შესახებ. როგორც ადვოკატებმა განაცხადეს, ისინი აპირებენ მიმართონ საქართველოს გენერალურ პროკურატურას, რათა მიაღწიონ საქმეების გამოთხოვას და თბილისში გადატანას. მათივე თქმით, ისინი უმაღლესი სასამართლოს მიერ (მოსამართლე გივი აბაშიძე) სხვა გადაწყვეტილების მიღებას არც ელოდნენ, მიუხედავად იმისა, რომ შუამდგომლობაში მითითებული მოტივაცია საკმარისი იყო, რათა აღმკვეთი ღონისძიება გაუქმებულიყო.

აქცია 4

როგორც ადვოკატები ამბობენ, ისინი შეხვდნენ დაკავებულებს და მათ მიმართ არანაირ ფიზიკურ ზეწოლას ადგილი არ ჰქონია. რაც შეეხება ფსიქოლოგიურს, – გამორიცხული არაა ასეთ ზეწოლას ჰქონოდა ადგილი, თუმცა თავად დაპატიმრებულები ამას არ ადასტურებენ. „შეიძლება ეშინიათ და იმიტომ ვერ ამბობენ ვერაფერს“, – თვლიან ადვოკატები, რომლებიც უმაღლესი სასამართლოს მისამართით აცხადებენ, რომ „დადგენილება გამოცხადდა სხდომის დამთავრებიდან 2 წუთში, რაც იმას ნიშნავს, რომ სასამართლოს დადგენილება წინასწარ ჰქონდა მიღებული“.

აქცია 5

ე.წ. „შავრაზმელებმა“ გუშინ, სასამართლოს შენობის წინ შეკრებილი ადამიანების მსუბუქი ავტომანქანით (სახ. ნომერი: AMA 661) მიადგნენ და წინააღმდეგობის გაწევის მიუხედავად პიკეტი მანქანითვე გაარღვიეს. ფაქტობრივად ხალხს გადაუარეს. რამდენიმე ადამიანი მსუბუქად დაშავდა. ეს ყველაფერი ქალაქის პოლიციის შეფის ჯუმბერ ტაკიძის თვალწინ ხდებოდა, რომელმაც ცოტა ხნით ადრე ხალხს კატეგორიულად მოსთხოვა გაეთავისუფლებინათ ქუჩა. ხალხი აჭარის შს მინისტრის მისვლას ითხოვდა, ვინაიდან ყველაფერში სწორედ მას ადანაშაულებდნენ და რატომღაც ხაზს უსვამდნენ იმას, რომ ასლან აბაშიძემ არაფერი იცის, რაც ხდება აჭარაში და მას გარემოცვა ატყუებს.

ჯუმბერ ტაკიძე

ჯუმბერ ტაკიძე

მინისტრი მოპიკეტეებთან არ მისულა. მოგვიანებით გზის გახსნა ისევ პოლიციას მოუხდა, რა თქმა უნდა, ძალის გამოყენებით. ხალხი მას შემდეგ დაიშალა, რაც ადვოკატებსა და შს სამინისტროს წარმომადგენლებს შორის მოლაპარაკებები დაიწყო.

აქცია 6

ოფიციალური ინფორმაციით, ნური ანანიძე  შეიარაღებული დაჯგუფების ჩამოყალიბებას გეგმავდა. როგორც ცნობილია, იგი ვეტერანთა კავშირის თავმჯდომარეა, რომელშიც ასეულობით ყოფილი მეომარია გაერთიანებული.

გადაბეჭდვის წესი


ასევე: