კვირის ამბები

პოლიტიკური სიუჟეტი რეკლამის ნიშნის გარეშე „25-ე არხის“ ეთერში

24.05.2016 • 1633
პოლიტიკური სიუჟეტი რეკლამის ნიშნის გარეშე „25-ე არხის“ ეთერში

„ტელეარხი 25“-ის ეთერში რამდენიმე სიუჟეტი გავიდა ოლიგარქ ლეონიდ ჩერნოვეცკის პოლიტიკური გეგმების შესახებ [გასულ პარასკევს მისმა შტაბმა პოლიტიკური აქტიურობის შეჩერებაზე გაავრცელა განცხადება], ასევე გავიდა ორი ვრცელი ინტერვიუ, რომელთაგან ერთ-ერთი ჩაწერილია 2013 წელს გადაცემაში „В гостях у дмитра гордона“. არც ერთ მათგანს არ აქვს მითითებული, რომ ეს რეკლამაა, როცა ტელეარხის დირექტორი გია სურმანიძე ამბობს, რომ ოლიგარქთან სარეკლამო ხელშეკრულებით თანამშრომლობს. ტელევიზია, რომელიც წინასაარჩევნო პერიოდში ეთერში პოლიტიკურ რეკლამას განათავსებს, „საარჩევნო კოდექსით“ და “კანონით მაუწყებლობის შესახებ “ვალდებულია განათავსოს ტიტრიც -„პოლიტიკური რეკლამა“.

გია სურმანიძე

გია სურმანიძე

ბატონო გია, ლეონიდ ჩერნოვეცკის ინტერვიუები, რომლებიც თV 25-ის ეთერით გადაიცა, იყო თუ არა რეკლამა?

დიახ, ეს რეკლამაა, რომელიც გათვალისწინებულია ხელშეკრულებით.

თუ საიდუმლო არ არის, რამდენი გადაიხადა პოლიტიკოსმა ამ ინტერვიუების ეთერში განთავსებისთვის?

კონფიდენციალურია ინფორმაცია, დავეკითხები იურისტებს, რამდენად გვაქვს ამის გათქმის უფლება. პირადად ჩემთვის ამ თანხის დასახელება არ არის ისეთი ამბავი, არ არის ეს ის თანხა, რომ რაღაც… საერთოდ, ვფიქრობ, რადგანაც გაჩნდა ამდენი კითხვა, ორშაბათს გავასაჯაროო ეს ხელშეკრულება, იურისტებს უნდა დავეკითხო, მაქვს თუ არა ამის უფლება.

რატომ არ ჰქონდა შესაბამისი წარწერა – „რეკლამა“ ამ ინტერვიუებს?

მაგი შეიძლება ისეც გაკეთდეს და ასეც. პრინციპში უნდა იყოს ხო, მაგრამ… ხელშეკრულებით ვმუშაობთ… ჩვენ გვაქვს ხელშეკრულება, როგორც სარეკლამო ინტერვიუზე, ისე სიუჟეტებზე, მაგრამ სიუჟეტები იქნება არა საინფორმაციოში, არამედ ეს იქნება _ სარეკლამო სიუჟეტები. მაგრამ მანამდე რაც იყო, საინფორმაციომ გააკეთა ინტერესიდან გამომდინარე და ის სხვა საკითხია. აწი უკვე იქნება ის, რასაც ხელშეკრულება ითვალისწინებს, და ჩვენ ხელშეკრულებით გვაქვს გაწერილი თუ რა, როგორ უნდა იყოს.

ანუ მომავალში ჩერნოვეცკისთან ინტერვიუებისა და სიუჟეტების ჩვენება სარეკლამო ხელშეკრულების საფუძველზე იგეგმება?

რა თქმა უნდა, არა მხოლოდ ბატონ ლეონიდესთან, არამედ ნებისმიერ პარტიასთან, ვისაც სურვილი აქვს. ახლა წინასაარჩევნო ჩაწერები იქნება. ოფიციალურად უკვე გამოცხადდა, 8-ში [ივნისს] იწყება წინასაარჩევნო პერიოდი და ნებისმიერს ვთავაზობთ რეკლამას. წინასაარჩევნოდ უკვე ცალკე ფასები გვექნება.

ხომ არ დაინტერესებულა მარეგულირებელი ამ საკითხით – ვთქვათ იმით, რომ საქმე გვაქვს შეფარულ რეკლამასთან?

რაც შეეხება პირველ ინტერვიუს, რაც გაკეთდა, ჩვენი ინტერესი იყო, რადგან _ პიროვნება შემოდის აჭარაში, ფინანსურად ასე უზრუნველყოფილი ადამიანი, პლუს აპირებს პოლიტიკაში მოსვლას და ინტერესი იყო მაღალი, მაგრამ ამას მასიური ხასიათი თავისთავად არ ექნებოდა. აქედან გამომდინარე, ჩვენ გადავწყვიტეთ გაგვეკეთებინა სარეკლამო ჩაწერა და კომერციული წინადადება. შესაბამისად, უკვე დავიწყეთ კომერციული მომსახურება. პირველი ინტერვიუ ჩაიწერა ინტერესიდან გამომდინარე. ყველას ჰქონდა ინტერვიუ მაგ ადამიანთან.

პირველი ინტერვიუ ჩერნოვეცკის პრესსამსახურის მიერ არის ჩაწერილი. მისი ინიციატივა იყო, რომ მის პრესცენტრს ჩაეწერა ინტერვიუ და არა ჟურნალისტს? რატომ არ ჩაწერა არხმა ინტერვიუ?

ჩვენს ჟურნალისტსაც აქვს ინტერვიუ ჩაწერილი მასთან და ამ დღეებში მასაც შევთავაზებთ მაყურებელს.

ანუ მისი პრესსამსახურის მიერ ჩაწერილი ინტერვიუ არ იყო სარეკლამო?

არა. მაგას რა მნიშვნელობა აქვს. ჩვენ გვაქვს თანამშრომლობის ხელშეკრულება, მასე რუსეთში 2013 წელს ჩაწერილი ინტერვიუც გავუშვით. ჩვენ გვაქვს ამ ადამიანთან ხელშეკრულება, რომელიც კიდევ რამდენიმე თვეს მოქმედებს. გვაქვს ყველაფერი ოფიციალურად. რა მნიშვნელობა აქვს, ვინ ჩაწერა. არის ინტერვიუ, არის ჩვენი ჩაწერილიც, ჩასული იყვნენ ჩვენი ჟურნალისტებიც. ასე გადავწყვიტეთ, იყო რამდენიმე ვარიანტი ჩაწერილი, როგორც ჩვენი, ისე თავისი ჩაწერილი. ვიზუალურად და ხარისხის მიხედვით ვარჩიეთ ის გაგვეშვა. არ გვიფიქრია, ვინ იქნებოდა ამ სიტუაციაში, მთავარი იყო აზრი გადმოგვეცა.

ზოგადად, თქვენი ხედვა როგორია – უნდა უთხრას თუ არა მედიასაშუალებამ თავის მომხმარებელს, რომ მის მიერ გავრცელებული ინფორმაცია არის რეკლამა?

კი, რა თქმა უნდა, უნდა უთხრას და ჩვენ ვალდებულება გვაქვს ამის. როცა დაიწყება წინასაარჩევნო პერიოდი, ვალდებულება გვაქვს ყველაფერი გადავაგზავნოთ მარეგულირებელში… ამას ყოველთვის ვაკეთებთ. სწორედ ამიტომ მინდა დავეკითხო იურისტებს და გავასაჯაროო ეს ხელშეკრულება, რათა ზედმეტი კითხვები აღარ გაჩნდეს.

საარჩევნო სუბიექტის რეკლამირებით და შესაბამისი წარწერის არ განთავსებით, ხომ არ ფიქრობთ, რომ დაარღვიეთ საარჩევნო კოდექსი?

წინასაარჩევნო პერიოდი არ არის ჯერ დაწყებული. აქედან გამომდინარე, არ ვიცი. ამიტომ ვამბობ, იურისტებს უნდა დავეკითხო მაქვს ვალდებულება თუ არ მაქვს. ამ ხელშეკრულებიდან გამომდინარე მე მაქვს ვალდებულება, რომ სარეკლამო სიუჟეტი იქნება თუ ინტერვიუ, მივანიშნო, რომ ეს სარეკლამოა, რომელსაც გავაკეთებთ შემდეგ ჩვენებაზე.

თქვენ ადრე ჩვენთან საუბარში აღნიშნეთ, რომ ახალ სატელიტზე გადადიოდით, გადახვედით უკვე?

ჯერ ვერ შევიცვალეთ სატელიტი, მიდის მოლაპარაკება, ამ დღეებში ვაპირებ ბაქოში ჩასვლას ამ თემასთან დაკავშირებით და ალბათ იმ თვეში უნდა გადავიდეთ. მეორე სატელიტზე იმიტომ გადავდივართ, რომ იგი გაცილებით უფრო იაფია. ჩვენ ვთანამშრომლობდით `ობიექტივთან~, ახლა მათთან აღარ ვთანამშრომლობთ, შესაბამისად, შემოსავალიც შეგვიმცირდა და ამის გამო გვიდნა, რომ ნაკლებხარჯიან სატელიტზე გადავიდეთ.

თქვენ მაშინ ასევე აღნიშნეთ, რომ აპრილიდან ტელევიზია ახალი პოლიტიკური თოქ-შოუებისა და სერიალის მოამზადებას, ასევე, ტექნიკის შეძენასაც გეგმავდა, ამ მხრივ რა ხდება?

ტექნიკა შეკვეთილია, ველოდებით, თვის ბოლოს იქნება ადგილზე და ახალი ფორმატით გავალთ ეთერში. რაც შეეხება გადაცემებს, მიდის უკვე მუშაობა და ამ თვის ბოლოს ან იმ თვის დასაწყისში დავიწყებთ ყველაფერს განახლებულად.

„საერთაშორისო გამჭვირვალობა – საქართველოს“ რეკომენდაციით, თუ წინასაარჩევნო პერიოდამდე პოლიტიკური შინაარსის სარეკლამო ვიდეოზე არ იქნება მითითებული, რომ ის პოლიტიკური რეკლამაა, ტელეკომპანიების სარეკლამო ტარიფები იქნება არაგამჭვირვალე და ასევე, შესაძლოა, განსხვავებულიც სხვადასხვა პოლიტიკური პარტიისთვის. ეს კი, თავის მხრივ, უარყოფითად იმოქმედებს პლურალური წინასაარჩევნო გარემოს ჩამოყალიბებასა და ამომრჩევლის ინფორმირებულობაზე. „აქედან გამომდინარე, მიგვაჩნია, რომ „საარჩევნო კოდქსში“ არსებული ზოგიერთი რეგულაცია, რომელიც არჩევნებამდე მხოლოდ 60 დღით ადრე იწყებს მოქმედებას, სხვა პერიოდშიც უნდა მოქმედებდეს“, – წერია ანგარიშში.

ინტერვიუ გამოქვეყნდა გაზეთ „ბათუმელებში“. ინტერვიუს მომზადების შემდეგ ცნობილი გახდა, რომ ლეონიდ ჩერნოვეცკიმ პოლიტიკური საქმიანობა შეწყვიტა.

გადაბეჭდვის წესი


ასევე: