გვიმრა კულტურული მემკვიდრეობის ძეგლში

პირველი აფთიაქის შენობის ფანჯრებიდან გვიმრები მოჩანს. კულტურული მემკვიდრეობის ძეგლი ბათუმის ცენტრში დგას და საგულდაგულოდ არის ჩაკეტილი. მცენარეები შენობაში დაგროვილ სამშენებლო მტვერში იზრდებიან და როგორც ჩანს, არც მორწყვა აკლიათ – ალბათ უფრო სახურავიდან ჩასული წყლით. ინვესტორს, რომელიც შენობას არ უვლის, მთავრობამ შეუსრულებელი ვალდებულებები ბევრჯერ აპატია.

კულტურული მემკვიდრეობის ძეგლების მიმართ პოლიტიკა აჭარის მთავრობას საზოგადოებამ არაერთხელ დაუწუნა. რიგითმა ბათუმელებმა ძეგლების დასაცავად სამართალდამცავ უწყებებსაც არაერთხელ მიმართეს. ამ ქალაქის საზოგადოებას ყოფილი პირველი აფთიაქის შენობის ბედიც აწუხებს.

5მემედ აბაშიძის ქუჩაზე ყოფილი პირველი აფთიაქის შენობა, რომლის შენარჩუნების მნიშვნელობაზეც არაერთხელ დაიწერა, წლებია მიტოვებული და მოუვლელია. შენობა დაკეტილია და მესაკუთრესთან დაკავშირება ვერ ხერხდება, მაგრამ აჭარის კულტურული მემკვიდრეობის დაცვის სააგენტოში ძეგლის მდგომარეობაზე ინფორმაცია მაინც აქვთ. „შიგნით რა მდგომარეობაც იყო, ისევ ის მდგომარეობაა. ზემოდანაც შეიძლება გადახედვა, არის იქ ისეთი ადგილები. ხავსი და გვიმრები არ არის თემა და პრობლემა. ძეგლზე მდგომარეობის კუთხით ბოლო ერთი წლის განმავლობაში არაფერი შეცვლილა“, – ამბობს სააგენტოს ხელმძღვანელი მირანდა ჩარკვიანი.

ვინ აიღებს პასუხისმგებლობას, თუ ძეგლი დაზიანდება? – ამ კითხვაზე პასუხის მიღებას აჭარის ფინანსთა და ეკონომიკის სამინისტროსგან „ბათუმელები“ სამი დღის განმავლობაში ცდილობდა. მინისტრის მოადგილის, იონა წითელაძის თქმით, შენობის მოვლის ვალდებულება მესაკუთრეს აქვს აღებული.

13052528_1266770700019569_739046744_oსააგენტოს ხელმძღვანელი ამბობს, რომ კულტურული მემკვიდრეობის სააგენტო ძეგლის დაზიანების შემთხვევაში დაუყოვნებლივ მოახდენს რეაგირებას – „თუ იქ ჩამონგრევა დაიწყება, ჩვენ მაშინვე მივწერთ მესაკუთრეს, რომ სასწრაფოდ იზრუნოს ძეგლის გამაგრებაზე, თორემ დაგაჯარიმებთ-თქო.“

N1 აფთიაქის ყოფილ შენობაში ინვესტორი სასტუმროს განთავსებას გეგმავდა. შპს „ჟასმინმა“ კულტურული მემკვიდრეობის სააგენტოს ძეგლის ფასადის უკან არსებულ ფართობზე 11-სართულიანი სასტუმროს მშენებლობის ნებართვის თხოვნით ერთხელ უკვე მიმართა. სააგენტომ ინვესტორს პროექტი დაუწუნა. გარდა ამისა, ინვესტორის გეგმებთან დაკავშირებით ბევრი არაფერია ცნობილი. ასევე უცნობია, ერთ დროს ქალაქის ყველაზე ეფექტური შენობის ფანჯრები როდემდე იქნება გვიმრებით დაფარული.

6პირველი აფთიაქი მემედ აბაშიძის გამზირზე XIX-XX საუკუნეების მიჯნაზე ააგეს ბათუმში. შენობაში თავიდანვე ფუნქციონირებდა „პეტკევიჩის აფთიაქი“ და „სოკოლოვსკის სამკურნალო“. ამ აფთიაქს მოიხსენიებს ცნობილი ნორვეგიელი მწერალი კნუტ ჰამსუნი წიგნში „ზღაპრული ქვეყანა“. ჰამსუნი ბათუმში 1899 წელს ჩამოვიდა, მწერალი ავად გამხდარა, ამიტომაც დასჭირვებია აფთიაქი.

აბაშიძის ქუჩას XX საუკუნის დასაწყისში მარიას გამზირი ერქვა. ეს ერთ-ერთი ყველაზე მჭიდროდ განაშენიანებული და საქმიანი ქუჩა ყოფილა ძველ ბათუმში. XX საუკუნის დასაწყისში აქ ცხოვრობდნენ ქალაქის შეძლებული ოჯახები და ფუნქციონირებდა საზოგადოებრივი დანიშნულების სხვადასხვა ობიექტი. მოედანზე (დღეს ევროპის მოედანი) აშენებული სახლების ფასადები გემოვნებით ყოფილა გაფორმებული.

აფთიაქის შენობა აჭარის მთავრობის ყოფილმა თავმჯდომარემ ლევან ვარშალომიძემ შპს „ჟასმინს“ პირდაპირი მიყიდვის წესით გადასცა. შენობის გამოსასყიდ თანხად კი მილიონი ლარი დაუწესა.

ნეტგაზეთის მასალების სხვა გამოცემებში გადაბეჭდვის წესი


ავტორი