ქედის მუნიციპალიტეტის სოფელ შევაბურში მცხოვრები 78 წლის იური ბასილაძე შპს „კაპიტალს“ 3 400 ლარს ედავება. კომპანიასა და იური ბასილაძეს შორის დავის მიზეზი სოფელ ბელტურში ბაგირზე დაკიდული ის ხიდია, რომელიც იურიმ ორ შვილთან ერთად კომპანიასთან სიტყვიერი მოლაპრაკების საფუძველზე შეაკეთა. იურის თქმით, გაწეული სამუშაოებისთვის კომპანია მას დაპირებულ ანაზღაურებას არ უხდის.
78 წლის იური ბასილაძემ სოფელ ბელტურში ბაგირზე დაკიდული ხიდი შპს „კაპიტალთან“ სიტყვიერი მოლაპარაკების საფუძველზე გასულ წელს ორ შვილთან ერთად გაარემონტა. როგორც თვითონ ამბობს, ხიდის გასარემონტებლად 45 დღე დასჭირდა. იურის თქმით, სკოლის მოსწავლვლეებისთვის გადაადგილების პრობლემა რომ აეცილებინა და რემონტი ახალი სასწავლო წლის დაწყებამდე დაესრულებინა, ამ ხნის განმავლობაში დილიდან საღამომდე თავდაუზოგავად მუშაობდა.
იური ბასილაძე
„ეს პირველი შემთხვევაა, მოტყუებული რომ დამტოვეს მოხუცებული კაცი. ჯერ კიდევ სამუშაოს დაწყებისთანავე ვთხოვდი კომპანიის წარმომადგენლებს ხელშეკრულება გაეფორმებინათ ჩვენთვის. სამი დღის შემდეგ საერთოდ აღარ გამოჩენილან ობიექტზე, მხოლოდ ტელეფონით ვუკავშირდებოდი. ხიდის გარემონტების დაწყებიდან დაახლოებით ერთი თვე იქნებოდა გასული, როდესაც გავიგე, რომ ამ კომპანიას ქედაში სხვა ობიექტები ჰქონდა აღებული და ის ობიექტები მიეტოვებინა. გამგებელთან ავედი, ვუთხარი კომპანიის წარმომადგენლები არ მოდიოდნენ, მე ხელშეკრულება არ მქონდა გაფორმებული და უხელფასოდ ხომ არ დავრჩებოდი. გამგებელმა მითხრა, ხიდის მშენებლობა არ გამიჩერო და რაც იმუშავე, ერთი თეთრიც არ დაგეკარგებაო. მეც გამგებლის სიტყვას ვენდე, მუშაობა გავაგრძელე და ხიდის გარემონტება დავასრულე. ვინმეს რომ არ ეთქვა ხიდი გაუღებავია და დაუსრულებელიაო, საღებავიც კი საკუთარი თანხით ვიყიდე, 85 ლარი გადავიხადე და სამუშაოები ხიდის გაღებვით დავასრულე“, – ყვება იური.
ხიდის შეკეთების დასრულებიდან შვიდი თვე გავიდა, თუმცა იურის და მის შვილებს დაპირებული თანხა – 3 400 ლარი დღემდე არ მიუღიათ. იურის სასამართლოს იმედი აქვს და სჯერა, რომ მისი შრომის საფასურს ამ გზით დაიბრუნებს. მის ინტერესებს სასამართლოში საიას იურისტები დაიცავენ.
ქედის გამგებელი დავით დუმბაძე ადასტურებს, რომ ხიდი 78 წლის იურიმ შეაკეთა. თუმცა, მისი თქმით, გამგეობას არანაირი ბერკეტი არ გააჩნია კომპანია აიძულოს, სამუშაოს შემსრულებელს თანხა გადაუხადოს.
„ერთადერთი, რაც ჩვენ შეიძლება კომპანიას მოვთხოვოთ, ეს არის დასაქმებულთა უსაფრთხოების დაცვა. რაც შეეხება ანაზღაურებას, ყველა მუშამ უნდა მოითხოვოს და ხელშეკრულება გააფორმოს კომპანიასთან. მე ვუთხარი ბატონ იურის სასამართლოსთვის მიემართა. გამგეობა დაადასტურებს, რომ ხიდი მან შეაკეთა, ჩვენ ამ კომპანიასთან ხელშეკრულება გავწყვიტეთ, რადგან ქედის გამგეობის ორი ტენდერით აღებული ვალდებულებები არ შეასრულა და ობიექტები დაუსრულებელი დატოვა. ამ სამუშაოების დასასრულებლად მეორედ მოგვიხდა ტენდერის გამოცხადება“, – ამბობს დავით დუმბაძე.
კომპანიის დირექტორი როლანდ დიასამიძე ამბობს, რომ ცდილობს იური ბასილაძეს მისი კუთვნილი თანხა მანამდე გადაუხადოს, ვიდრე სასამართლო პროცესი დაიწყება: „ქედის გამგეობამ შესრულებული სამუშაოებისთვის 7 000 ლარი ჩაგვირიცხა, რაც შეეხება ხიდზე მომუშავეთა ანაზღაურებას, იმ ობიექტზე მინდობილმა პირმა მომატყუა და იური ბასილაძეს თანხა არ ჩაურიცხა, ვცდილობ, თანხა მოვიძიო და გადავუხადო“.
ქედის მუნიციპალიტეტის სოფელ ბელტურის ბაგირზე დაკიდული საცალფეხო ხიდის, დამცავი გაბიონისა და მასთან ერთად სამ ობიექტზე ტენდერი ქედის გამგეობამ 37 305 ლარზე გასული წლის 25 მაისს გამოაცხადა. ხელშეკრულება ქედის გამგეობამ ტენდერში გამარჯვებულ შპს „კაპიტალთან“ 27 898 ლარზე ივნისში გააფორმა. იმავე დღეს გამგეობამ ამ კომპანიას კიდევ ერთი ხელშეკრულება გაუფორმა, რითაც კომპანია ვალდებულებას იღებდა, რომ 49 999 ლარით ქედის მუნიციპალიტეტში შიდა საუბნო გზების სარეაბილიტაციო სამუშაოებს განახორციელებდა. კომპანიამ ორივე ტენდერით ნაკისრი ვალდებულებების მხოლოდ ნაწილი შეასრულა, არაჯეროვნად შესრულებული სამუშაოებისთვის შესყიდვების ეროვნულმა სააგენტომ ქედის გამგეობის მოთხოვნა დააკმაყოფილა და კომპანია შავ სიაში გადაიყვანა.
ფოტოზე: ბაგირის ხიდი აჭარაში. ფოტო „ბათუმელების“ არქივიდან.
